Become a Member Today. Register Here

Women in Tech Macedonia Awards 2026: Запознајте ја Мартина Димоска

Пионер во идни технологии

Мартина Димоска

Program Human Systems Discipline Integrator NASA Johnson Space Center

Во рамките на Women in Tech Macedonia Awards, ги славиме луѓето кои со својата работа, визија и посветеност оставаат значаен печат во технолошката индустрија. Преку ова кратко интервју, ви ја претставуваме приказната на Мартина Димоска , добитничка на наградата „Пионер во идни технологии (Future Technologies Pioneer)“. 

Мартина Димоска е Program Human Systems Discipline Integrator, односно Програмски интегратор за системи на човечки лет во вселената при NASA Johnson Space Center во Хјустон, Тексас под Leidos. Во својата улога таа работи во рамките на EHP (Extra-Vehicular and Surface Mobility Program) и HHP (Human Health and Performance), поддржувајќи човечки вселенски летови, здравје и перформанси на екипажите при истражувачки мисии. Таа е прва жена аналоген астронаут од Балканот и има учествувано на вкупно четири аналогни астронаутски мисии во три различни држави, со работа поврзана со човечки перформанси, изолација, мисиски операции и подготовка за мисии на Месечината и Марс. Мартина е и основачка и претседателка на International Space Alliance, организација присутна во Македонија и во САД, посветена на проширување на достапноста до вселенски науки, технологии и можности за новите генерации.

Што значи ова признание за Вас?

Ова признание ми значи многу, особено затоа што доаѓа од заедница која ја разбира важноста на технологијата, науката и лидерството. Доаѓам од средина кoja што нема традиционална вселенска инфраструктура, па голем дел од мојот пат беше изграден преку упорност, самоиницијатива и глобални соработки.

 

За мене, оваа награда не е само лично признание, туку и порака дека талентот и амбицијата не зависат од тоа од каде доаѓате. Сакам младите луѓе, особено девојките, да видат дека е можно да се работи на мисии поврзани со вселената, технологијата и идните генерации дури и кога патот не е однапред дефиниран.

Предизвици и мотивација

Најголемиот предизвик беше да градам кариера во област за која практично не постоеше јасен пат кога започнав. Немавме национална вселенска агенција, локална индустрија или воспоставен систем што ќе покаже како некој од Македонија може да стигне до светот на human spaceflight и вселенските мисии.

 

Имаше многу моменти на неизвесност, финансиски предизвици, преселби и чувство дека постојано морам да докажувам дека припаѓам, и дома и надвор. Но она што ме мотивираше беше љубопитноста, љубовта кон науката и вербата дека ако успеам да отворам една врата, таа ќе остане отворена и за многу други по мене.

Иновација и придонес

Една од иницијативите на кои сум најгорда е основањето на International Space Alliance (ISA), организација создадена со цел да ги поврзе Балканот и меѓународната space заедница преку образование, иновации и нови можности за младите.

 

Преку ISA работевме на хакатони, STEM иницијативи, грантови, настани, глобални партнерства и програми што им овозможија на млади луѓе од регионот директно да се поврзат со вселенскиот екосистем, вселенските агенции и меѓународните експерти. За мене, најголемиот импакт е тоа што многу млади за првпат почувствуваа дека и тие имаат место во глобалната tech и space индустрија, без разлика од каде доаѓаат.

Tech Екосистем и заедница

Мислам дека на регионот најмногу му недостига долгорочна инфраструктура за поддршка на таленти, особено во deep tech, space tech и научно-истражувачки области. Имаме многу паметни и способни луѓе, но често недостигаат менторство, финансиска поддршка, меѓународни конекции и чувство дека постои простор за раст без луѓето целосно да заминат од регионот.

 

Дополнително, во помалите заедници премногу често постојат непотребни поделби, натпревар за влијание и лични суети, наместо искрена соработка и заедничко градење. А токму во мали екосистеми, взаемната поддршка, споделувањето знаење и меѓусебното охрабрување можат да направат огромна разлика и да придвижат цела генерација напред.

Мојата улога ја гледам во градење мостови. Сакам да отворам пристап до глобални мрежи, институции и можности за новите генерации, и да покажам дека луѓе од Балканот можат активно да придонесуваат во иднината на технологијата и вселенската индустрија.

Поглед кон иднината

Мислам дека би била најгорда што избрав да продолжам напред дури и кога патот беше неизвесен. Во многу моменти беше полесно да се откажам или да изберам посигурен правец, но секоја голема можност во мојот живот започна со ризик и верба во нешто што сè уште не постоеше.

И покрај сите притисоци од средината, сомнежите и пораките дека ова можеби „не е пат за мене“, сепак не се откажав. Тоа денес го сметам за една од најважните одлуки во мојот живот.

 

Се надевам дека за пет години ќе можам да погледнам наназад и да кажам дека сум помогнала да се создадат нови можности за идните генерации во науката, технологијата и вселената.

Порака до младите: